Umuvugizi w’igisirikare cya Uganda, Maj Gen Felix Kulayigye, yatangaje ko igisirikare cya Uganda cyashyizeho ingamba z’ubwirinzi ku mupaka uhihuza na Congo nyuma yaho mu Burasirazuba bwa Congo, mu ntara ya Kivu ya Ruguru umutwe wa M23 ufashe ibice bitandukanye birimo na Goma.

Itangazo ry’igisirikare cya Uganda ryo kuri uyu wa Gatanu tariki ya 31 Mutarama 2025, rivuga ko izi ngamba z’ubwirinzi zigiye gushyirwaho kugeza igihe ibintu bizasubira mu buryo.

UPDF ivuga ko impamvu ishyizeho izi ngamba ari ukugira ngo babashe gukomeza guhangana n’imitwe yitwaje intwaro ikorera mu Burasirazuba bwa Congo irimo na ADF ishobora kwinjirira muri iki kibazo cy’umutekano mucye gihari.

Igisirikare cya Uganda gisanzwe gifatanya n’icya leta ya Congo mu bikorwa byo guhangana n’imitwe yitwaje intwaro irimo na ADF.

Mu Ugushyingo 2021 nibwo ingabo z’impande zombi zatangije ibi bikorwa bya gisirikare bihuriweho mu kurwanya uyu mutwe witwaje intwaro . Ni ibikorwa byiswe  ’Operasiyo Shujaa’.

Umutwe wa ADF ukunze kwibasira ibice bitandukanye byo mu Ntara ya Ituri.Umaze imyaka isaga 20 ukorera muri Congo.

Igisirikare cya Uganda  (UPDF) ku bufatanye n’icya Congo, bamaze igihe  batangije ibitero byo guhashya uwo mutwe, ariko bisa nk’aho nta musaruro ufatika biratanga kuko ibikorwa by’uwo mutwe bitahagaze.

Icyakora hari abashobora guhuza izi ngamba z’ubwirinzi no gusa nkaho Uganda iryamiye amajanja kuko leta ya Congo yahize gutera u Rwanda bityo ikaba yaca muri iki gihugu.

Ibi byafashwe nk’ubushotoranyi kuri ibyo bihugu ndetse byamaganirwa kure.